ФОКУС НА ДЕНОТ: Заев најави брзи избори, ВМРО-ДПМНЕ прифати
Објавено во: Македонија 19 Октомври, 2019
Премиерот Зоран Заев денеска на прес-конференција изјави дека во Брисел ни направија голема неправда, а ЕУ не остана на ветеното.
Најави организирање брзи предвремени избори, на кои граѓаните ќе донесат одлука во кој правец ќе се движи Македонија. Oва ќе го изнесе утре на лидерската средба кај претседателот Стево Пендаровски.
Заев се заблагодари на сите европски лидери кои се бореа да се додели датум за Македонија.
„Факт е дека ние сме жртви на историска грешка на ЕУ, и тоа предизвикува кај сите нас огромна огорченост, и јас сум разочаран“, рече Заев.
Вели дека ваква одлука е донесена поради нерешени работи во ЕУ.
„Европскиот сон на македонскиот народ нема да биде срушен“, изјави Заев.
Побара сите двојно повеќе да работиме за да имаме европска земја.
Лидерот на ВМРО ДПМНЕ Христијан Мицкоски, го прифати предлогот на премиерот Зоран Заев за брзи предвремени парламентарни избори, но не е сигурен дали премиерот ќе го одржи дадениот збор.
Мицкоски се надева дека на утрешната лидерска средба ќе се постигне договор за избори.
Тој прифаќа избори веднаш со почитување на законите за формирање на техничка влада.
Вели дека откако ВМРО - ДПМНЕ ќе ја формира новата влада ќе мора да го почитува Преспанскиот договорот, како што вели неправдата која друг ја донел, ќе ја исправат со обезбедување на двотретинско мнозинство во Собранието.
Лидерот на Демократската унија за интеграција, Али Ахмети изјави дека изборите се најдобро решение, по недобивањето на датумот за започнување на преговорите. Вели дека од недобивањето датум, не треба да се разочаруваме, туку да се организираме и да бидеме поуспешни во почнатите реформи.