Филипче: Се испитува уште едно лице, ќе се ограничат сите јавни собири

Добивај вести на Viber

Министерот за здравство ќе препорача Владата на посебна седница која е закажана за денеска да усвои информација со која ќе се ограничат сите јавни собири во државата. Препораката ќе биде да не се одржат Струмичкиот карневал и карневалот во Прилеп, но и сите други собири. Најверојатно тоа ќе значи дека нема да се одржуваат и спортските натпревари, но министерот Венко Филипче на прес конференцијата денеска рече дека деталите ќе ги соопшти по седницата.

„Препораката ќе биде да се ограничат масовните јавни собири, согласно законот за спречување заразни болести - јас прво ќе ја дадам до Управувачки комитет до ЦУК и тој предлог денеска ќе го ставиме на седница на Влада со специјална точка. За да одлучиме дали ќе се воведе оваа мерка, рече Филипче. 

Тој информираше дека пациентката кај која веќе е потврден корона вирусот е во стабилна состојба, сместена е во оддел за изолација, нема знаци за компликации. Постепено влегува во фаза на задравување. Информираше и дека добро оди домашната изолација на луѓето кои биле во директен контакт со неа односно патниците од комбето и нивните блиски.

Двајцата патници од Италија за кои вчера се испитуваше се негативни на корона вирус, но има еден друг патник од Струмица кој се вратил од Италија на 22 февруари и кој вчера се пожалил дека има покачена температура. Испитувањата за него се во тек. 

Дополнително двајца бугарски државјани на работа во битолска фирма, биле во Италија и не даваат податок дека биле во контакт со заболени лица, но им е даден совет да се јават на телефоните ако зебележат нешто. 

Во Европа заболени се 774 лица од кои 650 се во Италија.