„ФЕРШПЕД“ ВО ЗОНАТА НА ПОЗИТИВАТА - компанијата со профит од 1,33 милиони евра за девет месеци

Добивај вести на Viber

Моќната компанија „Фершпед“ годинава успешно се враќа во зоната на позитивата.

Ако за првите девет месеци од минатата година компанијата на семејството Накови била во загуба од 265 илјади евра, во истиот период од годинава таа влегува во сосема солидна добивка по оданочување, од 1,33 милиони евра.

Компанијата своите резултати ги објави преки Македонската берза, заедно со образложение на остварениот финансиски резултат. 

„Групата Фершпед АД Скопје во  периодот јануари - септември 2021 година оствари оперативна добивка во износ од 86.414  илјада денари искажана во консолидираниот неревидиран биланс на успех“, се вели меѓу другото во образложението.

Вкупните консолидирани приходи во оваа групација за периодот од првите девет месеци од годинава изнесуваат 3.493.544 илјади денари и во споредба со остварените вкупни консолидирани приходи за истиот период 2020 година се зголемени за 52 отсто.

Остварените консолидирани оперативни приходи за овој период изнесуваат 3.488.710 илјади денари и се зголемени за 53 проценти во однос на консолидираните оперативни приходи за истиот период 2020 година.

Финансиските приходи бележат пад во однос на истиот период минатата година.

„Вкупните консолидирани  расходи за период јануари - септември 2021 година во износ од 3.403.333 илјади денари бележат раст за 49 отсто во однос на вкупните консолидирани расходи за истиот период  2020 година“, објаснуваат од компанијтата.

Консолидираните оперативни расходи изнесуваат 3.402.296 илјади денари и истите бележат зголемување за 49 отсто во однос на истите од 2020 година.

Финансиските расходи бележат пад во однос на  истиот период минатата година.

„Група Фершпед АД Скопје во периодот јануари - септември 2021 година прикажува добивка од редовно работење. Нето добивката пред оданочување во анализираниот период изнесува 90.211 илјади денари (1,47 милиони евра - н.з.)“, потенцираат од компанијата.

Н.Н.Ф.