Европа го слави денот на победата над фашизмот, во Русија само онлајн-програма
Објавено во: Свет 09 Мај, 2020
Наместо традиционалната парада на Црвениот плоштад, ќе има само воздухопловна демонстрација во 47 руски градови. Рускиот претседател Владимир Путин ќе се обрати пред нацијата и ќе положи цвеќе пред споменикот на Вечниот пламен. Масовниот традиционален митинг „Бесмртен полк“, се планираа да се одржат само преку интернет, а програмата завршува со испукување артилериски плутони.
Централната манифестација во светот по повод победата над фашизмот традиционално се одржува во Москва на Црвениот плоштад со дефиле на припадници на различни родови на руската армија, како и ветерани од Втората светска војна. Но, оваа година поради пандемијата на коронавирусот, ќе биде одржана само воздухопловна парада на авиони и хеликоптери на небото над Москва. Големата воена парада и маршот на „Бесмртниот полк“, според најавите на руските власти, ќе бидат одржани кога ќе има услови за тоа.
Светот денеска го одбележува Денот на победата над фашизмот. На 9 мај 1945 година безусловната капитулација на Третиот Рајх е потпишана во разурнатиот Берлин, само неколку минути по полноќ, на 9 мај.
Од над 50-те милиони жртви, 20 милиони беа од тогашниот Советски сојуз, а повеќе од 30 милиони беа цивили. Во нацистичките логори беа убиени околу 12,5 милиони луѓе, од нив шест милиони Евреи. Материјалната штета од Втората светска војна само во Европа беше проценета на околу 260 милијарди американски долари.