ЕСМ ГО ПРИЗНА ДЕФЕКТОТ И ИЗЛЕВАЊЕТО НА ВОДА ОД ХЕЦ ВРБЕН - стручни лица се на терен и работат на санација на оштетениот дел од каналот
Објавено во: Економија 30 Септември, 2022
ЕСМ ја призна хаваријата која се случила во општината Маврово-Ростуше, односно за пукањето на каналот на ХЕЦ Врбен, што довело до излевање на водата, што се случило поради интензивните врнежи од дожд.
Велат дека нивни екипи преземаат мерки за санирање на оштетениот дел од каналот и тврдат дека преостанатиот дел од каналот бил во функција и непречено ги носел водите до хидроелектраната Врбен.
„На доводот Горна Радика, поточно Речки канал, во општината Маврово Ростуше, како последица на интензивните врнежи во последните неколку дена, се случи појава на лизгање на теренот и оштетување на дел од каналот, при што дел од водата се излева надвор од доводот.
Наши стручни лица се на терен и се преземаат сите мерки околу санирање на оштетениот дел од каналот, кој во преостанатиот дел е во функција и непречено ги носи водите до хидроелектраната Врбен“, се вели во соопштението од ЕСМ, државен производител на електрична енергија.