Екс-министерот Јанакиески во судот се пожали дека не може да биде вработен, бидејќи е во притвор
Објавено во: Македонија 16 Октомври, 2019
Поранешниот министер за транспорт и врски Миле Јанакиески денеска во судот се пожали дека не може да биде вработен, бидејќи една година е во притвор.
Како што пренесе Макфакс, на повторниот нов почеток на судењето за предметот „Насилство во Општина Центар“, судијата Душан Јосифов им го утврдувал идентитетот на обвинетите.
На прашање на судијата за личен документ за обвинетиот Миле Јанакиески, тој рекол дека сите документи му се во судот. „Не може да бидам вработен, една година сум во притвор. Пасошот ми е во судот“, рекол Јанакиески пред судот.
Обвинетиот Александар Трајковски рекол дека за разлика од 2016 година, кога било поднесено обвинението, сега е невработен. Тој додека беше вработен во Царината, го посети Никола Груевски во Унгарија и за тоа беше поведена дисциплинска постапка.
Денешното судење, поради истекот на 90 дена од претходното рочиште, почнало од почеток, со произјаснување за вина. Сите обвинети рекле дека не се чувствуваат виновни. Предметот е во судот од 2016 година.
Обвинетите во предметот се товарат за дека го поттикнале насилството што се случи при протестите пред Општина Центар во јуни 2013 година.