Eден човек ќе купи 4.000 станови во Берлин
Објавено во: Економија, Свет 29 Септември, 2020
Eден човек ќе купи 4.000 станови во германскиот град Берлин и тоа ги налути жителите.
Норвешки милијардер има намера да купи скоро 4.000 станови во градот каде покривот над глава стана луксуз, објави српски „Н1“.
Жителите во објектите кои милијардерот има намера да ги купи веќе се побунија и бараат од градските власти да го искористат правото на предност при купувањето.
Меѓутоа, советникот на градскиот округ и заменик градоначалник на централната општина Берлин-Мите, Ефраим Готе, вели дека некои од зградите кои компанијата планира да ги купи во овој округ не спаѓаат во областите каде станарите се заштитени.
Тоа е најголема инвестиција во недвижен имот во Берлин, откако сенатот во покраината воведе мерка со која се спречува произволно зголемување на закупнината.
Шведската компанија „Хелмстаден Бостад“ зад која стои норвешкиот милијардер Ивар Толефсен, најави дека има намера да купи 130 станбени згради во Берлин, односно, вкупно 3.902 станови, 208 деловни простории и 321 места за паркирање, кои чинат вкупно 830 милиони евра.
Во Берлин дел од граѓаните се во постојан судир со инвеститорите во секторот за недвижнини, затоа што цените на закупнините во градот во последната деценија се зголемија двојно.
Проблемот е во тоа што цената на становите во Берлин отсекогаш била многу пониска, со оглед на тоа што граѓаните на Берлин отсекогаш заработувале помалку од германскиот просек.