Дуцинас: Владата на Грција не глуми преговори, туку навистина преговара за името
Објавено во: Македонија 20 Април, 2018
Партеникот на грчката владеачка партија Сириза, Костас Дуцинас, и претседател на Парламентарниот комитет за одбрана и надворешна политика, професорот на Биркбек Универзитетот од Лондон, Костас Дуцинас смета дека Грција мора да ја сфати својата улога, но и одговорност на регионален лидер во контекст на преговорите за името со Македонија.
- Јас ве уверувам дека што се однесува на волјата кај „Сириза“, таа е сосема присутна. Оваа Влада не глуми преговори, навистина преговара. Свесни сме дека решението не е битно само за вас, туку и за Грција, и најважно – за целиот регион. Имајќи ја предвид секогаш чувствителната безбедносна ситуација на Балканот, ако не успееме да најдеме решение, постои опасност од раст на национализмот во двете земји, но и надвор од границите, во опкружувањето. Од друга страна, да се дојде до решение, тоа ќе значи дека испраќаме една силна порака до националистите и иредентистите насекаде дека ова се нови времиња, времиња на можности и на прогрес. Затоа решението е важно за сите. Ние мора да изградиме еден силен сојуз, не само со вашата земја туку и со Албанија, со Бугарија. Грција и покрај кризата, останува најголема и економски најмоќна земја во регионот, ние мора да сме свесни дека тоа ни дава една одговорност да им помогнеме на нашите соседи и на целиот регион, да растеме заедно“ вели првиот човек на Комитетот за надворешна политика и одбрана во изјава за „Капитал“.
Дуцинас е познат по своите критики кон екстремниот национализам и токму во таа насока отворено вели дека против тоа зло мора сите одговорни политики и општествени фактори да се борат обединето. Тој е познат по своите либерални ставови и е силно почитуван во академските кругови, не само во Грција туку и во светски рамки.