Државниот пазарен инспекторат има нов директор
Објавено во: Македонија 18 Мај, 2021
Владата назначи нов директор на Државниот пазарен инспекторат.
На предлог на Комисија за именување, Владата ја именуваше Анета Симеска Димоска за в.д. директор на Државниот пазарен инспекторат. Таа е дипломиран инженер технолог и магистер по бизнис администрација со специјалност за комерцијална ревизија на финансиски извештаи во услови на примена на информациските технологии. Има 28 годишно работно искуство, од кои 19 години како државен пазарен инспектор, а од 2017 до 2020 година беше пратеник во Собранието. Симеска-Димоска доаѓа на местото на Стојко Пауноски, кој беше разрешен од Владата на 27 април 2021 година, поради, како што соопшти Владата тогаш, непрофесионално однесување. Пауновски беше разрешен откако јавно кажа дека не може да ги преземе во ДПИ 32-цата вработени кои му ги определи Владата, туку само оние кои имаат соодветно образование. На конгресот на СДСМ имало реакции за разрешувањето на Пауновски. Вработените во ДПИ потпишуваа петиција за да му дадат поддршка на Пауновски.
Тој рече дека премиерот Зоран Заев немал разбирање за одбраната на интегритетот.