Драстично е намален бројот на Македонци кои патувале во Грција

Добивај вести на Viber

Драстично се намалил бројот на патувања од земјава во Грција. Во текот на 2020 година имало за 84,5 отсто помалку пристигнувања од Македонија во Грција. 

Од над три милиони пристигнувања во 2019 година по копнен пат од Северна Македонија во Грција, минатата годин поради пандемијата и затворените граници, бројот е сведен на 500.000. Тоа значи дека е регистриран пад од 84,5 отсто, во согласност со податоците од Институтот на Здружението на грчки туристички бизниси (ИНСЕТЕ), јави дописничката на МИА од Атина. Во 2019 година, се регистрирани  3.250.120 пристигнувања по копнен пат од Македонија во Грција, наспроти 503.894 лани, од кои 311.706 пристигнувања се во првите два месеци од 2020 година, пред почетокот на пандемијата. Во јануари регистрирани се 149.020 пристигнувања, за 90.8 проценти повеќе од истиот месец во 2019 година, во февруари 162.686, скоро на исто ниво како и една година претходно. Намалувањето започнува од месец март, по воведените први рестрикции, по што имаше период од два месеци кога границите  беа целосно затворени. Пред пандемијата, најголем  дел од македонските граѓани патуваа  на море во Грција. Кај јужниот сосед туризмот има значаен удел во националниот БДП. 

foto freepik