Преговарачката рамка се смета за најважен документ во којшто земјите членки ги утврдуваат своите позиции, а потоа Европската комисија која технички преговара во име на земјите членки, треба да ги почитува тие позиции и потоа континуирано да ги информира земјите членки.
- Преговарачката рамка прво се објавува како драфт-верзија на Европската комисија. Беше најавено дека ќе се објави на 3 јуни, но сега е поместено за 9 или 10 јуни заедно со краток извештај за напредокот на реформите. Откако ќе се објави драфтот, тогаш земјите-членки го дополнуваат со своите национални позиции и бараат консензус. Се надевам дека овој предлог ќе биде неутрален и повеќе ќе се заснова на принципите на унијата, рече денеска вицепремиерот за евроинтеграции Бујар Османи од Штип, одговарајќи на новинарско прашање.
Драфт-преговарачката рамка се усогласува потоа со позициите на земјите членки. Македонија по одлуката на ЕУ за отпочнување на преговорите очекува преговарачката рамка да се усвои во текот на хрватското претседателство, а првата меѓувладина конференција да се одржи во текот на германското претседателство, односно до крајот на годинава и да започнат скрининзите потоа.
