Директорот за условите во „Шутка“: Дозволено е да се внесува храна од ресторани
Објавено во: Македонија 11 Декември, 2018
Директорот на истражниот затвор „Шутка“, Ѓоко Котевски, каде во последно време престојуваат и „елитни“ притвореници“, вели дека условите во ќелиите и третманот е еднаков за сите. По објавата на 1ТВ дека поранешниот директор на УБК, Сашо Мијалков, добива топол оброк секојдневно од хотелот „Мериот“, управникот вели дека според прописите, затворениците имаат право да внесуваат храна од надвор, домашна или од ресторан, но таа мора да биде адекватно спакувана и јасно декларирана.
Тој вели дека во моментов казна затвор издржуваат 150 осудени лица, а капацитетот е до 170.
- Согласно куќниот ред, ако зборуваме за притворените лица тие имаат право да се хранат со храна од надвор или од ресторан, но таа мора да биде донесена од страна на лица на нивното потесно семејство или лица кои имаат дозвола од суд. Секако храната мора да биде херметички спакувана со потекло, со декларација да се знае од кој ресторан е купена итн. Во нашиот затвор има и кантина. На притоврените лица нивните најблиски или нивните бранители можат да им уплатат средства на сметка и преку нашата кантина да добијат дел од производите. Кантината е збогатена со производи, ги има сите основни. Морам да напоменам дека во затворот единствен начин да се добие течност – сокови и напитоци, е само преку кантината на затворот – вели Котевски во разговор за МИА.
Тој додал дека самите притвореници може да си ги подобрат условите со тоа што ќе бидат наградени доколку се примерни, но никако не смеат да кориустат мобилни телефони.
Во рамки на процесот на ресоцијализација, осудените лица се работно ангажирани во браварска, столарска, автомеханичарска работилница, земјоделие и во секторот хигиена.