ДИМИТРОВ И ЦАРОВСКА СЕ КАЧИЈА НА ТОЧАЦИ - таргет им е ЕУ
Објавено во: Македонија 11 Јули, 2020
„Ако сакаме да бидеме здрава нација, треба да обезбедиме соодветна инфраструктура за велосипедите“, рече Никола Димитров, носител на листа во изборната единица 1 од коалицијата „Можеме“, кој утрово заедно со ко-носителката Мила Царовска предводеа колона велосипедисти од Паркот на новинарите преку центарот на градот и населбата Аеродром, до Градскиот парк во Скопје. Иницијативата беше отворена за сите граѓани љубители на велосипедизмот, а покрај на велосипеди, имаше и скопјани кои дојдоа со електрични тротинети и ролери.
„Денес тукушто завршивме една убава иницијатива – возевме на велосипеди, на точаци, низ победничко Скопје. Симболот, мотото беше: Возиме сите напред кон ЕУ, таму каде што припаѓаме. Државата ни полни 29 години оваа година, долго време сме низ тунелот, на еден чекор сме до пристапни преговори со Европската Унија. Имаме огромна шанса и имаме намера да ја зграпчиме и да ја искористиме“, рече Димитров.