Димитриеска-Кочоска: Немам пристап до софтверот за работа со фирми

Добивај вести на Viber

Дополнителната заменик-министерка за финансии, Гордана Димитриеска-Кочоска, се огласи дека не и е даден пристап до софтверската алатка во Министерството за финансии преку кое може да се проверат обврските на државата кон добавувачите.

„Зошто Министерството за финансии не одговара на моите барања? Ако ги погледнеме податоците кои ги поставуваат на интернет страната на министерството и направиме една анализа (која нема да е целосна бидејќи обврски пријавуваат многу помалку субјекти од потребните, а притоа никој ништо не превзема да се надмине оваа состојба, а велат транспарентни се) повеќе од јасно е дека обврските кон добавувачи во оваа и следната година растат“, напиша заменик-министерот на „Фејсбук“.

Таа додава дека во нејзиниот случај не може да провери кон кои фирми задолженоста се зголемува и со кои од нив најмногу се работи.

„Каде е заштедата за која зборуваше СДС? Каде е нивното домаќинско работење? За жал зборот транспарентност се злоупотребува. Доколку ми дадеа пристап до софтверската алатка ќе можевме да видиме кон кои фирми обврските растат, ќе можевме да анализираме со кои фирми работат. Граѓаните треба да знаат што се случува во министерството. За жал уште еднаш СДС покажаа дека освен личните интереси ништо повеќе не гледаат“, додава таа.

Димитриеска-Кочоска потсети дека Македонија на Индексот на демократија на „Економист“ е помеѓу државите со хибриден режим со највисока стапка за корупција.