ДИМИТАР КОВАЧЕВСКИ: Многу брзо ќе ги демантирам етикетите од опозицијата, ќе донесам квалитетни промени во партијата
Објавено во: Македонија 29 Ноември, 2021
Димитар Ковачевски, фаворит на Зоран Заев за негов наследник на лидерската позиција во СДСМ, кој вчера потврди дека ќе се кандидира за нов претседател на партијата, вели дека „не е ничиј човек, туку е човек со интегритет и големо професионално искуство соодветно за позицијата претседател на СДСМ“.
Во интервју за МИА тој говори дека е ослободен од внатрепартиски поделби и игри, кои ги смета за непродуктивни.
Во врска со актуелниот претседател во оставка - Зоран Заев вели дека постигнал извонредни резултати во својот мандат, иако СДСМ на овие избори на некој начин беше казнет од своите гласачи кои решија да останат дома или да гласаат за помали партии и независни листи.
СДСМ на 12 декември ќе гласа за нов лидер, по оставката на Зоран Заев по поразот на локалните избори.
Ковачевски наведува дека „многу брзо“ ќе ги демантира „етикетите“ кои му ги дава опозицијата со тоа што, како што вели, ќе постигне резултати со работа.
„Мојот фокус е да донесам квалитетни промени кои граѓаните и нашите членови ги очекуваат, но и многу брзо ќе ги препознаат“, вели Ковачевски.
Тој додава дека државата освен решавањето на „историските проблеми со соседите“, треба да се фокусира и на клучните проблеми дома, на борбата со криминалот и корупцијата, реформи во судскиот систем, јакнење на економијата и подигнување на животниот стандард на граѓаните.