ДИК: Ако нема приговори уверенијата за мандати на 28 декември
Објавено во: Македонија 26 Декември, 2016
Државната изборна комисија со доцнење од речиси 4 часа конечно излезе за да ги соопшти првичните официјални резултати од прегласувањето на избирачкото место 2011 во Теарце.
Причината за доцнење е потешкотиите кои општинската изборна комисија ги имала при составување на записникот за резултати од територија на цела општина Теарце вклучувајќи ги и денешните гласови.
Александар Чичаковски посочи дека ако нема приговори за денешното гласање, ДИК на сите кандидати кои добија пратенички мандат уверенијата за пратеници ќе им ги достави на 28 декември во среда до 20 часот.
Тоа се однесува на конечните резултати од првите пет изборни единици, како и за сите потврдени мандати од изборната единица 6, што значи доколку нема приговори и последните два мандати врз кои можеше да има влијание исто така ќе бидат потврдени со уверение штом резултатите бидат официјални и конечни.
Според симулацијата на ДИК поделбата на мандати во ИЕ 6 е следна:
ДУИ 6
ВМРО-ДПМНЕ 4
БЕСА 3
СДСМ 3
АЗА 2
ДПА 2
Вкупно на цела територија ВМРО-ДПМНЕ и коалицијата имаат 51 пратеник и се победник на овие избори.