Дарежливиот газда од Охрид го следи трендот на добра заработувачка од станови во градот
Објавено во: Економија 22 Септември, 2020
Новко Плаќаноски, еден од најуспешните бизнисмени во Охрид и деновиве познат по тоа што им платил летување на 126 вработени во Турција, според запишаното во Централниот регистар, ќе се испроба и во изградбата и продажбата на станови во градот-бисер.
Во текот на минатата недела му е одобрено основањето на Делта Инвестмент со седиште во Охрид, каде што Плаќаноски е еден од четворицата сопственици, а дејноста на друштвото е изградба на станбени и нестанбени згради. Тој ни ја потврди регистрацијата на компанијата, но повеќе не сакаше да зборува за тоа колку се амбициозни неговите планови во овој бизнис.
По 1.500 евра за метар квадратен плаќале граѓани годинава за станови во Охрид Од Агенциите за недвижнини во овој град за Фактор велат дека годинава имало јагма за овие недвижнини во градот. Со оглед на тоа што понудата е помала, а имало голема побарувачка цените отишле нагоре. Агенти за продажба велат дека становите се продавале за 1.300 - 1.400 евра за квадрат. Ова е навистина висока цена, каква не е регистрирана ниту во центарот на Скопје каде недвижнините се доста поскапи со години.
Од последната година на објавените биланси, Компанијата на Плаќаноски, НО.МА. Метал , која се заминава со производство на метални производи во 2018 остварила приход од 21,7 милиони евра и профит од 327.000 евра. Во Топ-10 најприходни фирми во Охрид е уште една металска компанија, а тоа е П.Н. Метал во која ко-сопственик е повторно Плаќаноски, со производство на печки и горилници, а остварила приход од 8 милиони евра и добивка од 970.000 евра.
Стружанецот по потекло изминатата недела се популаризираше откако вработените го пофалија дека им обезбедил ултра ол-инклузив аранжман во Турција. Бизнисменот ги испратил со чартер лет во Анталија и покрај тоа што вледее голема неизвеснот во македонската економија поради коронавирусот.
Тој поседува уште неколку помали бизниси како ресторан, кафуле и сместувачки објект.
А.К.