Данела Арсовска денеска ќе ги објави новите директори

Добивај вести на Viber

Градоначалничката на Град Скопје, Данела Арсовска, најави дека денеска во текот на денот ќе ги објави имињата на новите директори на јавните претпријатија, откако претходно ескалираше соработката со ВМРО-ДПМНЕ.

„Постапката е завршена, комплементарно ќе бидете информирани. Кога ќе бидат објавени имињата. Многу брзо… во тек на денот“, изјавила Арсовска за Алсат ТВ.

Голем дел од институциите под Град Скопје се без директор, бидејќи директорите кои дојдоа од редовите на ВМРО-ДПМНЕ си поднесоа оставки, а во меѓувреме Арсовска се препукуваше дури и со лидерот на ВМРО-ДПМНЕ, Христијан Мицкоски.

Градоначалничката на Скопје Данела Арсовска уште нема прифатено ниту една оставка на директорите од ВМРО-ДПМНЕ, кои уште пред две недели ги доставија до Градот. Тиквата пукна кога беше разрешен директорот на ЈП „Водовод и канализација“ Златко Перински во врска со набавка на пречистителна станица од 136 милиони евра.

Најпрво оставки поднесоа директорите на ЈП „Градски паркинг“ Бојан Христовски и на депонијата „Дрисла“ Јане Мицевски. Потоа оставките поради немање комуникација и соработка со Арсовска поднесоа и директор на ЈП „Улици и патишта“ Борис Настов, на „Лајка“ Воислав Димитровски и на ЈП „Паркови Зеленило“ Ангеле Сотировски.

Во јавните претпријатија во Град Скопје на функција останаа само директорот на ЈСП „Скопје“ Александар Стојковски и директорката на „Комунална хигиена“ Косана Мазнева.