Дали бројот на неважечки ливчиња ги загрижува политичарите?

Добивај вести на Viber

Од општина до општина и на овие локални избори варира бројката на неважечки гласачки ливчиња. 

Во првиот круг од гласањето за градоначалници на 80 општини на седмите по ред локални избори што се одржаа во неделата има вкупно 44.833 неважечки ливчиња. На гласањето за градоначалник на Град Скопје, има 15.940 неважечки ливчиња. 

Со поништување на ливчињата, граѓаните покажуваат дека не се задоволни од понудата и не се приклонуваат на ниту една опција. Во Битола има над 2.600 неважечки, во Куманово повеќе од 2.000, во Охрид над 1.400, во Тетово повеќе од 1.900, во Струмица над 1.200. Според податоците на Државната изборна комисија, во Пехчево имало 80, во Штип 1.148 неважечки, во Ресен 356, во Прилеп 1.649, во Пробиштип 565, во Радовиш 545, во Неготино 579. 

Рената Арнаудова, поранешна советничка од ЛДП во Советот на Општина Охрид смета дека бројката на неважечки гласачки ливчиња конкретно во Охрид е висока и тоа го поткрепува со фактот дека бројката на гласачи е едно, но реално има луѓе кои се заминати надвор од државата или во Скопје и прашање е дали воопшто на денот на гласањето некој од главниот град ќе дојде во Охрид за да го оствари своето гласачко право. 

„Со неважечкото ливче според мене, луѓето покажуваат револт, незадоволство, разочарување. Едноставно не сакаат да ги гласаат ниту едните, ниту другите и не се задоволни од понудата. Дали во партиите ги анализираат овие бројки, не знам, но сметам дека сега се фокусирани да мотивираат што повеќе гласачи за во вториот круг. Мислам дека во вториот круг ќе има помалку неважечки ливчиња, и дека граѓаните ќе излезат за да одлучат кој ќе биде градоначалник“, вели Арнаудова. 

Во Кичево има 898 неважечки, во Кратово 261, во Крива Паланка 441, во Крушево 322, во Дојран 79, во Дебар 298 неважечки ливчиња. Во Центар Жупа има 62 неважечки гласачки ливчиња. 

Фехми Скендер, поранешен претседател на Советот на Општина Центар Жупа смета дека дел од неважечките ливчиња станале неважечки поради тоа што постарите жители не се доволно едуцирани околу начинот на гласање. 

„Кај нас бројот на неважечки ливчиња со години е во исти граници, но ние имаме многу стари и изнемоштени лица кои нема кој да ги донесе на гласање, затоа што младите се на печалба, и при гласањето се случуваат и грешки. Можеби е потребна едукација за начинот на гласање“, вели Скендер. 

Ако се вратиме наназад, на предвремените парламентарни избори што се одржаа во 2016 година имало дури 38.712 неважечки ливчиња. Бројот на неважечки во 2014 година бил 23.428 ливчиња. На претседателските избори во 2009 година имало дури 45.513 неважечки ливчиња.