Добивај вести на Viber
Доктор Нико Беќаровски од Токсикологија, преку фејсбук статус дава неколку корисни совети до здравствените власти во земјава, како и до неговите колеги од Комисијата за заразни болести.
Тој смета дека наместо награда за матичните доктори, подобро е да се укине партиципацијата за сите вакцинирани лица во цела наредна година, како и да се издвојат прележаните од групата на невакцинирани граѓани.
„Почитувани колеги од Комисијата за заразни болести.
Ако навистина сакате да стимулирате вакцинација, место понижувачката парична стимулација за матичните лекари, укинете ја партиципацијата за сите медицински услуги во 2022 година на сите вакцинирани (слично како што е за крводарителите).
Ако сакате да се намали антиваксерското расположение, издвојте ги вистински прележаните од групата на невакцинирани, барем 120 дена по прележувањето.
Воведете го позитивниот резултат од тестот (не постар од месец дена) на антитела, како валиден доказ за влез во сите места каде се бара вакцинален сертификат, по 120 ден од прележувањето.
Предложете висока парична казна или затворска казна за секој кој ќе биде фатен со фалсификуван сертификат.
Вратете го задолжителното мерење на телесна температура при влегување на работа и во сите јавни затворени објекти“, вели д-р Беќаровски во својата објава на социјалната мрежа фејсбук.