ЦИПРАС НА ШЕГА: Следниот пат веќе нема да можете да го користите терминот Република Македонија

Добивај вести на Viber

За Грција има два клучни услови околу компромисот за името – едниот е сложеното име со географска одредница, а вториот е тоа да биде одржливо решение, изјави грчкиот премиер Алексис Ципрас, по завршувањето на европскиот Самит на прашање на дописничката на МИА од Брисел за посетата на Никос Коѕијас.

„Не треба да биде „олеснета верзија“, туку одржливо решение за да се создаде силен дијалог меѓу народите, името треба да биде за секоја употреба, меѓународна, билатерална, но и за внатрешна употреба. Не може да има различно име во Обединетите нации, а да продолжи да се нарекува Македонија во Уставот. Договорот не е лесен, во Грција многу луѓе се противат, но ова е историска шанса која треба да се искористи“ - изјави Ципрас.

Ципрас, како што јави дописничката на МИА од Брисел, за прашањето за името најпрвин полушеговито и одоговорил: „Следниот пат веќе нема да можете да го користите терминот Република Македонија, туку Горна или која било друга опција“.

Премиерот потоа порача дека Грција ги има „најдобрите намери на светот“.

За тоа како ги коментира руските закани упатени кон Македонија дека има негативни ризици за регионалната стабилност доколку земјата влезе во НАТО, Ципрас вели дека не треба трети страни да се вмешуваат и дека прашањето за името е билатерално и ќе се решава во рамките на ОН.