Чувал повеќе сим картички, списоци на броеви: Уапсен измамникот кој бараше пари за да „враќа“ стари пензии
Објавено во: Македонија 16 Јануари, 2020
Полицијата го уапси четириесет и едногодишниот измамник И.П од Гевгелија кој им се јавуваше на граѓани со тврдење дека може да им среди да им се вратат заостанати пензии за што од нив барал соодветен паричен надомест. Од струмичката полиција денеска известија дека тој претставувајќи се како теренски работник на ПИОМ од Гевгелија барал од потенцијалните „жртви“ да уплатат од 1.700 до 4.000 денари за тој да им среди да си ги вратат парите. За деталите Фактор веќе пишуваше.
- Пријавениот во неколку наврати во изминатиот период извршил кривични дела „измама“ лажно претставувајќи се и како З.Ј. наводно вработен како теренски работник во ПИОМ Скопје, при што доведувал во заблуда поголем број на граѓани од Република Северна Македонија, барајќи од нив да уплатат од 1.700 до 4.000 денари, а со цел да подигнат парични средства од сметката на Фондот за пензиско и инвалидско осигурување во висина од 170.000 до 450.000 денари по разни основи, стои во известувањето од струмичката полиција.
Од страна на полициски службеници при извршен претрес во домот на пријавениот при што биле пронајдени и одземени телефонски апарати, сим-картички, документи и поголем број на мобилни телефонски броеви и лични податоци од оштетени лица.
За настанот е известен јавен обвинител и по целосно документирање на случајот против пријавениот полицијата ќе поднесе соодветен поднесок.