Царовска: Газдите ќе одговараат ако не ги исплатат платите веднаш
Објавено во: Економија 31 Јули, 2020
Фирмите итно да и ги исплатат на вработените платите за кои добие државни субвенции, рече денеска вицепремиерката Мила Царовска. Ако не се случи тоа, Владата најверојатно ќе побара од Јавното Обвинителство да покрене постапка за утврдување кривична одговорност против одговорните лица во компаниите.
„Платите итно треба да се исплатат на работниците, треба да се покаже одговорност од нивна страна, ова е голем пропуст којшто е направен и секако дека санкционирање на фирмите ќе се случи. Во моментов Генералниот секретаријат на Владата ги разгледува правните можности, се покренуваат сите елементи коишто се можни и за истото наскоро ќе бидете известени“, вели Царовска.
Владата вчера попладне ги објави имињата на фирмите кои не исплатиле плати, а зеле субвенции.
Јавноста го крена гласот против работодавачите, а се бараше и кривична одговорност.
Се работи за 708 компании кои земале пари за исплата на априлска и мајска плата, но парите никогаш не легнале на трансакциските сметки на работниците. Овие фирми не исплатиле 162 илјади евра по основ плата за месец април и 222 илјади евра за месец мај, Оштетени се 1.700 работници кои останале без примања, а дури 52 илјади луѓе добиле пониска плата од минималната.