Буџетот на Комсија на 25 ноември, опозицијата ќе „нападне“ со амандмани
Објавено во: Економија 19 Ноември, 2019
Опозициската ВМРО-ДПМНЕ ќе го „нападне“ предложениот буџет за идната година со голем број амандмани, дознава Фактор. Според нашите сознанија, ќе бидат поднесени меѓу 300 и 400 амандмани на владината верзија за тоа како идната година треба да изгледа националната каса.
Точната бројка амандмани ќе се знае во текот на денешниот ден, кога, според нашите информации, најголемата опозициска партија планира да ги направи последните доусогласување на корекциите што ќе ги предложат на буџетот.
ВМРО-ДПМНЕ, дознаваме, годинава најмногу ќе се концентрира на ниските капитални инвестиции, за кои Владата идната година предвидува сума од 383 милиони евра, или, како што велат, целосниот недостиг од капитални инвестиции.
„Со амандманите ќе бараме за капитални инвестиции да се издвојат поголеми суми, а парите за таа намена да се префрлат од високо предвидениот износ за договорни услуги, како и од другите непродуктивни трошоци што ги бара власта“, велат од опозициската партија.
Власта минатата година првично предвиде сума од над 400 милиони евра за капитални расходи, но со оглед што постојано има нивно потфрлање, реши оваа година да ги проектира на, како што наведе, реални основи.
Инаку, матичната собраниска Комисија за финаснсирање и буџет расправата за овој најзначаен економски документ планира да ја почне на 25 ноември, односно од понеделник идната недела.
Согласно Деловникот за работа на Собранието, вообичаено за расправа на Комисијата за буџет на пратениците им се даваат на располагање 10 дена, од кои пет за општа дискусија, а пет за расправа и гласање по амандманите.
Според нашите сознанија, пак, веќе на 16 декември е предвидено предлог буџетот за идната година да се најде на пленарна седница на Собранието, каде пратениците имаат на располагање уште пет дена да дебатираат, а потоа и да гласаат за националната каса.
Буџетот за идната година е предвидено да тежи 3,9 милијарди евра, што е најголем буџет досега, а се базира на планиран раст од 3,8 отсто, и буџетски дефицит од 2,3 проценти од БДП.
( Н.Н.Ф.)