Брус Ли има повеќе врски со Србија од Никола Тесла, вели Милановиќ

Добивај вести на Viber

Брус Ли има повеќе врски со Србија од Никола Тесла, изјави хрватскиот претседател Зоран Милановиќ. 

Вели дека Србија може да го именува аеродромот во Белград по Брус Ли, бидејќи, како што рече, тој има врски со Србија, како и со Тесла.

Според него, можеби не е во ред Хрватска да го присвојува Никола Тесла, но Србија има уште помалку права на тоа, по повод најавата дека ликот на овој научник ќе биде на хрватското евро, јавува загрепската Н1 телевизија.

„Тесла помина помалку време во Србија отколку јас денес во Оклај. Тесла е Американец, тој беше толку сериозно сфатен во Хрватска и Виена што побегна во Америка. Хрватска имаше криза на идентитет со Тесла и тоа беше нејасна љубов“, изјави Милановиќ. 

Доколку Хрватска ја реализира најавата за поставување на ликот на Никола Тесла како еден од симболите на хрватските монети, Србија сигурно ќе преземе соодветни мерки, соопшти денеска Народната банка на Србија.

„Народната банка на Србија смета дека евентуалното поставување на ликот на Никола Тесла на хрватските евромонети, доколку Хрватска стане членка на еврозоната во наредниот период, би претставувало присвојување на културното и научното наследство на српскиот народ, со оглед на тоа што е неспорно дека славниот научник во текот на својот живот се изјаснувал како Србин по потекло и род. Во тој поглед сосема е сигурно дека ќе бидат преземени соодветни активности кон релевантните институции на ЕУ со цел да се укаже на несоодветноста на ваквиот предлог”, изјавиле од банката за српски „Телеграф“.

Хрватскиот премиер Андреј Пленковиќ рече дека граѓаните на Хрватска се тие што предложиле Никола Тесла да биде на монетите на идното евро и дека тие никогаш не треба да земаат нешто од некого.