Блажев: Има граѓани што продале имот, или штеделе пензии за да им бидат на едно место, и потоа парите им пропаднаа
Објавено во: Финансии 13 Октомври, 2020
Оштетените штедачи од Еуростандард банка очекуваат сите партии да го поддржат предлог-законот за обесштетување, за кој велат дека треба да ја исправи неправдата нанесена на штедачите, правни и физички лица.
Драган Блажев во отвореното Студио 10 на ТВ24 рече дека со пропаѓањето на банката најмногу изгубиле граѓаните кои со години штеделе и сега остануваат без своите пари. Дополнително удар им е зададен и на фирмите.
„Не се само депозитите, иако има и такви. Има и граѓани што работат со банката. На пример, а има и доста такви случаи, некој продал имот, а сумата што ја зел, мора да оди преку банка. Тој граѓанин ја користел Еуростандард банка, со неа работел, и парите се пренесени на трансакциска сметка во Еуростандард банка. Тоа значи дека овие граѓани не ни добиле никакви камати, туку едноставно луѓето работеле со таа банка и сега парите на трансакциската сметка им се заробени и сето тоа сега ќе оди во стечајната маса. Значи, тој граѓанин продал имот за да купи нешто друго или да направи нешто друго, а сега нема ниту имот, ниту пари“, појасни Блажев.
Или, луѓе штеделе на пример пензии.
„Има еден таков случај. Граѓанинот се пензиониорал, еден месец пред да пропадне банката ги става парите во банката, за да бидат парите на едно место и да знае неговото семејство каде се парите, тоа да биде на едно место, за не дај боже, за сигурност, а сега ги губат сите пари“, рече Блажев.
Според него, не се проблем само физичките лица, туку голем е проблемот и со фирмите.
„За фирмите нема никакво обештетување. А фирмите работат по закон, кој го донела државата, и според него, мора да работат пртеку банка, односно сите трансакции, депозити, се оди преку банка. А тука има 2.000 фирми. Значи, 2.000 фирми во ова време на пандемија, се оставени без никакви пари. Немаат никаква ликвидност, им се заканува затворање, а нивните вработени не можат да земат плата и можат да останат без работа. И позади нив стојат семејства. Има такви случаи. Значи, во време на пандемија, фирмите се оставени буквално без никаква заштита. Ова е апел, да се размисли што да се прави со овие фирми, кои се навистина во една многу тешка состојба“, рече овој штедач.
Тој нагласи и дека околу 60 проценти од кредитното портфолио на банката е ризично.
„Тоа се пари давани на ткн. ненаплатливи или тешко наплатливи кредити, кои се познати како нефункционални кредити. Може да замислите, во нашиот банкарски систем, просечното ниво на нефункционални кредити, кај сите банки е 4,7 отсто, а овде се 60 отсто, или изразено во бројки, тоа е 60 милиони евра“, рече Блажев.