Бизнисот со дијализа подели 20 милиони евра во 2018
Објавено во: Финансии 24 Јули, 2019
Безмалку 20 милиони евра фактурирале центрите за дијализа од Фондот за здравствено осигурување во 2018-та, односно 35 милиони денари повеќе од една година претходно поради зголемениот број на третмани.
Концесионерите Центар за дијализа Диамед Македонија и Систина Нефроплус ја предводат листата поради најгоемиот број на пациенти, односно третмани, што се должи на тоа што имаат мрежа од повеќе свои центри низ цела Македонија. Центар за дијализа Диамед Македонија заработил 543,7 милиони денари лани, додека Систина Нефроплус фактурирале од 441 милион денари. На трето место е Диамед Скопје, кој исто така го поседува странски концесионер, со наплатени 95,5 милиони денари, а потоа следуваат јавните установи Универзитетска клиника за Нефрологија и ГОБ „8 Септември“ со 55, односно 46 милиони денари.
Вкупниот број на третмани на ниво на цела година е 213.844. Станува збор за третирање 1.460 лица со хронична бубрежна инсуфициенција со во просек остварени 12 дијализни третмани над секој од нив во месецот. Фондот за еден пациент на годишно ниво само за дијализните третмани издвојува просечно околу 800.000 денари.
Во овој пакет на здравствената услуга, на центрите, покрај за хемодијализниот третман содржани се и
задолжителните дијагностички испитувања, како и патните трошоци од местото на живеење до центарот за
дијализа и обратно на пациентите. При формирањето на надоместоци кои Фондот им ги плаќа на приватните здравствени установи се земени предвид бројот на осигурените пациенти кои се третираат,
просечниот број на дијализни третмани по пациент, референтната цена за дијализа, реализираните
здравствени услуги во претходната година и очекуваното зголемување на бројот на пациенти на дијализа на
годишно ниво.
Средствата наменети за дијализа се трети на листата на најголеми расходи во примарното здравство кај Фондот за здравствено осигурување со потрошени 1,24 милијарди денари за оваа намена, по матичните лекари и аптеките.
А.К.