Битиќи: Се преговара со четири странски инвестиции

Добивај вести на Viber

Вицепремиерот за економски прашања Фатмир Битиќи, одговарајќи на новинарско прашање, рече дека во моментов Владата е во преговори со уште четири странски инвеститори и дека во наредниот период очекува да биде потпишан договорот со Киел, производителот на композитни седишта. Ова Битиќи го најави по потпишувањето на договорот за државна помош за втората инвестиција на ВИК во зоната на прилепски Алинци.

- Ние сме подготвени, доколку е подготвена другата страна, уште денеска да го потпишеме договорот, или пак следната недела, рече Битиќи за најавата на Киел дека сака да произведува и седишта за возови во Македонија и за тоа да инвестира 3,5 милиони евра.

Предлогот на Билал Касами, претседателот на Беса, да се применува двојазичност во приватните компании е неприфатлив за Битиќи, бидејќи тој вели дека приоритет треба да биде конкурентноста.

- Денеска ние зборуваме за конкурентна економија и денеска зборувавме на три јазици. Ние се стремиме кон пристапот на конкурентност, како клучен момент, рече вицепремиерот, а за најавениот четврт пакет мерки најавува дека доцна во петок ќе се знае колку пари ќе тежи. 

ВИК во првиот циклус реализираше над 10 милиони евра во Алинци, каде работат 250 лица во производството главно на кафемати. Сега инвеститорот најавува 100 нови работни места за Прилеп и околните населени места. 

- Во последната година и пол бевме мошне успешни во производниот процес и имавме испорака на квалитетен производ. И не само кафемати, туку и други мали производи за домаќинство. Имаме голем капацитет во Прилеп и мошне наскоро ќе се прошириме уште повеќе, со нови развојни активности, рече Вернер Шоеб, генералниот директор на ВИК.