Бибер смета дека ако Македонија не добие датум, Србија и Косово ќе се обесхрабрат
Објавено во: Македонија 16 Октомври, 2019
Експертот за Балканот од Универзитетот во Грац, Флоријан Бибер вели дека одлуката на шефовите на дипломатиите на земјите членки на ЕУ да не се одобри почеток на пристапните преговори со Северна Македонија и Албанија може да „го поткопа кредибилитетот“ на Унијата.
„Набљудувачите во регионот ја сметаат француската и холандската политика како нефер и мотивирана од домашната политика и од стереотипите. Ова го поткопува имиџот на ЕУ како фер играч, со фер критериуми, особено затоа што Комисијата даде зелено светло за преговори“, изјави Бибер за Еуроњуз.
Бибер вели дека ваквиот став најверојатно ќе испрати негативен сигнал до владите на Северна Македонија и Албанија, кои можат да помислат дека не вреди да се прават тешки компромиси ако не бидат примени во европскиот блок.
Тој оценува дека ваквиот став испраќа порака и до Србија и Косово, кои имаат најголем отворен проблем во регионот, да се запрашаат зошто некоја од нив би склучила тежок договор, кога ЕУ не може да им даде ништо за возврат.