Бектеши ги кажа своите очекувања за тоа дали угостителските објекти ќе бидат затворени уште две недели
Објавено во: Економија 10 Април, 2021
Во интервју за Гласот на Америка, министерот за економија Крешник Бектеши, меѓу другото го откри и своето очекување дали ќе има уште една нова забрана за работа на угостителските објекти, по сегашната во траење од две недели.
„Ситуацијата во дејноста угостителство е тешка, имајќи ја предвид и последната одлука на Владата, но секако дека ние сме при крај за дизајнирање на мерка која ќе биде само за угостителските објекти и туризмот како област во целина. Убеден сум исто така дека наредната недела ќе биде деблокирано и Собранието каде дополнително ќе можат да добијат финансиска помош за исплата на плата, и со тоа ќе бидат зачувани сите работни места во угостителството и туризмот. Но, дополнително на тоа освен мерките кои ги креираме согласно приходот кој го имале во првите три месеци, како грант или како директна субвенција, Македонската банка за обнова и развој ќе има бескаматни кредити, каде ќе има грант за овој многу важен сектор“, вели во интервјуто Бектеши.
На прашањето дали очекува дека после првите две недели, ќе продолжи истата мерка, односно објектите ќе бидат затворени уште две недели, Бектеши вели дека тоа не го очекува.
„Па не верувам дека ќе продолжи за дополнителни две недели, имајќи ги предвид бројките и проекцијата која ја презентираше Комисјата за заразни болести. Јас сум убеден дека нема да останат затворени, бидејки сите институции многу будно ја следат ситуацијата, но имајќи ја предвид непредвидливоста со оваа пандемија, никогаш не се знае. Но, секако дека ние сме подготвени ако има потреба дополнително да ги помогнеме“, рече министерот за економија.