Банките никаде не простуваат камати, тие мора да останат стабилни за добро да ни ги чуваат парите, вели првата финансиерка
Објавено во: Финансии 01 Април, 2020
Првата финансиерка, Нина Ангеловска, вели дека во ниту една земја банките нема да им ги простат каматите на граѓаните, па дури и оние што воведоа мораториум на обврските.
Таа смета дека е битно банките да останат стабилни, за да можат да и даваат поддршка на економјата и после коронакризата, но и дека е подобро со нив да се води конструктивен дијалог, наместо да се тераат мерки да преземаат со сила.
Ваков е нејзиниот став на прашањето зошто банките, за периодот од шест мееци колку што ќе трае одложувањето на ратите од кредитите, сепак, ќе наплатуваат камата од граѓаните, но и за тоа што тие не дадоа мораториум на обврските.
„Често се коментираше зборот мораториум. Конструктивен дијалог е подобар од наложување или диктатура. НБМ, МФ и Владата соработуваа за соодветно решение. Тоа е да се заштитат граѓаните денес и во иднина. Тоа што банкарскиот сектор е стабилен, треба да биде таков и по корона кризата. Се поставуваше прашање дали сите банки ќе ги одложат отплатите, и еве гледаме дека тоа се случува не само за три, туку и за шест месеци“, рече Ангеловска.
Кога станува збор за каматите, вели Ангеловска, треба да имаме предвид дека дури и кај земјите кај кои се воведе мораториум, каматите не се бришат комплетно односно не се простуваат.
„Словенија, Црна Гора, Албанија, Словенија, каматите течат, за да нормално продолжи да функционира банкарскиот сектор. Банките треба да се солидаризираат, но треба да ги чуваат парите на граѓаните и во иднина“, смета министерката за финансии, Нина Ангеловска.
Н.Н.Ф.