Автопатот затворен, една жена е потешко повредена
Објавено во: Македонија 16 Јануари, 2020
Сообраќајката на автопатот Велес-Скопје во која се судрија повеќе возила, го затвори автопатот целосно за сообраќај. Ова го потврдија и од АМСМ.
„На автопатот Велес-Скопје, кај местото Кула, случена е сообраќајна незгода помеѓу повеќе возила и автопатот Велес -Скопје е целосно затворен за сообраќај“, пишува во информацијата од АМСМ.
На терен излегле екипи од СВР Велес, се чекаат информации од местото на настанот.
Се смета дека најверојатна причина за сообраќајката е лизгавиот коловоз.
Телевизија Телма објави дека една жена е потешко повредена, додека петмина други се со полесни повреди. Според нивни информации, жената била префрлена во скопскиот Ургентен центар, но засега се прават испитувања на сериозноста на повредите со кои што се здобила. Останатите петмина биле префрлени во велешката болница.