АСО: Осигурителните компании да се воздржат од поделба на дивиденда и бонуси

Добивај вести на Viber

Да преземат мерки да го одржат капиталот и солвентноста и да се воздржат од распределба на добивката во форма на дивиденда - ова се дел од препораките за осигурителните компании кои денеска ги донесе Агенцијата за супервизија на осигурувањето (АСО). Осигурителниот сектор е стабилен, а АСО, будно ги следи состојбите и потенцијалните ризици кои може да влијаат на осигурителниот сектор од ширењето на вирусот КОВИД-19, велат оттаму. По одржаната седница со која претседавал претседателот на Советот на експерти Крсте Шајноски, од Агенцијата ги соопштија и заклучоците кои важат за сите учесници на пазарот на осигурување во земјава. 

Впрочем ќе се одложи започнувањето на прекршочни постапки кон субјектите на супервизија, а ќе се одложи спроведувањето на претходно планираните теренски супервизии на друштвата за осигурување и останатите субјекти на супервизија. Од АСО соопштуваат и дека се овозможува флексибилност во доставувањето на редовните извештаи кои субјектите на супервизија имаат обврска да ги достават до Агенцијата во периодот на траење на вонредната состојба во државата, со можност истите да се достават во дополнителен рок од 30 дена од законски утврдениот рок.

„Им се наложува на субјектите на супервизија да ги преземат сите можни мерки за одржување на нивниот капитал и солвентност во насока на целосна заштита на правата на осигурениците. Се препорачува субјектите да се воздржат од распределба на добивката на друштвата во форма на дивиденда или други бонуси кон членови на органи на управување како и воздржување од трошење на средствата на друштвата на непродуктивни расходи, во периодот додека трае кризата. Се препорачува друштвата за осигурување да бидат свесни за околностите во кои се наоѓаат клиентите и да постапуваат правилно со нив во текот на целиот циклус почнувајќи од побарување, купување на производот/услугата, и обновување на договорот, стои во известувањето од АСО.

Во меѓувреме ќе се одложи и организирањето на обуки и испити за застапници во осигурување и осигурителни брокери.

„Агенцијата продолжува континуирано да ја следи состојбата и да презема соодветни мерки неопходни за намалување на негативното влијание врз стабилноста на осигурителниот пазар и заштитата на правата на осигурениците, стои во известувањето.