АПАСИЕВ ОБВИНУВА ДЕКА СДСМ ОД НИВ ЈА ПРЕКОПИРАЛЕ ИДЕЈАТА ЗА КАМАТИТЕ - ова е прв чекор кон кршење на прангите на должничкото ропство
Објавено во: Финансии 16 Септември, 2021
Лидерот на Левица и пратеник, Димитар Апасиев, реагира дека СДСМ од нив го препишале законот со кој се предвидува каматите да не можат да бидат поголеми од долгот, но тие се приклучиле на предлог законот, така што сега и Левица ќе бидат негови предлагачи.
„Вчера, СДС на Нашата Земја, се обиде ќутенката да препише дел од Изборната програма на Левица (од 2016 и 2020) насочена кон она што ние го викаме АНТИЛИХВАРСКО ЗАКОНОДАВСТВО.
Арно ама, јас и пратеникот Крмов, им напраивме една финта... Поднесовме писмено известување до спикерот дека се приклучуваме кон доставениот материјал, така што - формално правно - и ние сме предлагачи на овој добар закон, кој го донесовме со 80 гласа, а кој е буквално прекопиран од нашата програма (оти само ние од сите партии го имавме ставено како предизборно ветување)“, пишува Апасиев на својот фејсбук профил.
Тој објаснува дека законот предвидува т.н. забрана на АНАТОЦИЗАМ - неможност за течење камати на каматите!
„Ова е првиот чекор кон кршење на прангите на должничкото ропство на граѓаните, кога за главен долг од 500 ЕУР требаше да плаќаат и до 5.000 ЕУР!?
По доаѓањето на власт, ваквите регулативни мерки насочени против лихвобанкарите, а во корист на народот, ќе станат наша и ваша реалност“, пишува Апасиев.