Адвокатот Спасе Скорниев ќе тужи затоа што полицаец му ја пцуел сестрата што работи во Влада
Објавено во: Македонија 15 Август, 2020
Спасе Скорниев, адвокат од Велес, ќе ја тужи велешката полиција, зашто како што тврди тој, еден полицаец му удрил шлаканица, а друг му ја пцуел сестрата што работи во влада, додека приведен шест часа седел на столче во станица.
Ова се случило, според адвокатот, откако бил приведен зашто додека возел со својот кабриолет на еднонасочна улица пред велешкиот суд повозрасен човек легнал пред неговото возило и се преправал дека бил удрен.
– Се изнаслушав еден куп гнасни работи. Ми ја пцуеа сестра ми што работи во влада, ме провоцираа, ме прашаа што ми вредело тоа што знам повеќе јазици, штом сум завршил во станица. Што сум се правел фраер со кабриолетот исто така ме прашаа, а тој е 2.000 евра. Извадив и лекарско за главата, за раката и за забите. Кој ме тепал ќе го тужам и ќе барам 7 милиони евра оштета. Јас сум комплетно психички уништен а и кариерата уште непочната ми е завршена. Кој ќе оди да го брани адвокат за кого цел град зборува дека завршил во станица тепан?, истакна Скорниев за Слободен печат.