Зошто Косово не сака Србија да се вклучи во истрагата за убиството на Ивановиќ?
Објавено во: Балкан 18 Јануари, 2018
Косовскиот министер за правда, Абделјад Тахири, денеска изјави дека Косово нема да дозволи Србија да биде вклучена во истрагата за смртта на претседателот на Граѓанската иницијатива на СДП, Оливер Ивановиќ.
Посочи дека за истрагата се надлежни Обвинителството и полицијата на Косово.
Сепак вели дека се подготвени да соработуваат со Србија за тој случај.
„Во никој случај не сакаме мешање во истрагата на која било друга институција, освен на оние на Република Косово. Ќе примаме информации од Србија што ќе доведат до апсење, но не и нејзино мешање во истрагата. Тоа ќе го правиме само ние“ - изјави Тахири за онлајн-изданието на „Газета експрес“.
Во заедничката изјава издадена од косовското Министерството за правда и она за внатрешни работи, стои дека убиството на Ивановиќ е неприфатливо, дека не може да се толерира и дека таквите дела бараат итна реакција.
И два дена по атентатот, во кој Ивановиќ со шест куршуми беше ликвидиран во Косовска Митровица, нема трага од извршителите.
Приврзаници, симпатизери и државни функционери дојдоа во Алејата на заслужни граѓани во Белград, да му оддадат последна почит на лидерот на косовското српско малцинство.