Тоне ли Македонијатурист како Титаник?

Добивај вести на Viber

Најголемата хотелиерска компанија во првите шест месеци годинава има пад на оперативната добивка од 61 отсто и таа изнесува само 17,2 милиони денари. Приходот од продажба за првата половина од годинава изнесува 125,7 милиони денари и во споредба со истиот период лани е помал за 22 отсто односно за 35 милиони денари, ова се најважните параметри од полугодишниот финансиски извештај на „Македонијатурист“.

Споредбата на податоците по години исто така покажува дека „Македонијатурист“ го губи своето пазарно учество. Лани разликата во приходи од продажба меѓу првиот и вториот квартал била 96 милиони денари во корист на периодот април-јуни 2016 година. Годинава разликата меѓу првиот и вториот квартал е 80 милиони денари во корист на вториот квартал. Овој податок покажува пад на пазарното учество од 16 милиони денари во споредба со лани, во основната дејност на друштвото тоа е хотелиерство и угостителство.

Работи ли компанијата? Финансиските приходи се поголеми од оперативната добивка!

„Македонијатурист“ заличува на финансиска институција. Од менаџирањето со нејзините средства годинава за првите шест месеци има финансиски приходи од 28,9 милиони денари. Тие се за 13 отсто повисоки од лани. Според паричниот тек во структурата на финансиски приходи приносот од камати учествува со 21,14 милиони денари и е за 21 отсто поголем од лани. Приносот од дивиденди изнесува 7,85 милиони денари и е поголем за 20 отсто од однос на лани. Вкупно од двете ставки компанијата има принос од 29 милиони денари. Во паричниот тек пишува дека во хартии од вредност или заеднички вложувања компанијата инвестирала 2,2 милиони евра во првите шест месеци годинава. Во билансот на состојба пишува дека нејзините краткорочни вложувања надминаа 20 милиони евра и во споредба со лани се поголеми за 12 отсто! Зошто „Македонијатурист“ дојде во ситуација во која нејзините финансиски приходи се безмалку двојно поголеми од нејзината оперативна добивка?

До кога менаџментот ќе се вади на „нелојална конкуренција“?

Зошто менаџментот во образложените објавено кон финансискиот извештај ги повторува истите фрази за нелојална конкуренција? Имаат ли стратегија за хотелиерско работење во вакви услови? Свесно ли одат во намалување на пазарното учество на сопствена штета? Како на овој тренд ќе реагираат големите инситуционални инвеститори – инвестициските фондови кои вложуваат во акциите на „Македонијатурист“?

Зошто акцијата на „Македонијатурист“ расте кога паѓа нејзиното пазарно учество и добивката?

Во периодот од 19 јули до сега акцијата на „Македонијатурист“ порасна значајно од 3.800 денари до 4.600 денари. Во овој период истргувани се 8.450 акции со право на глас. А само во еден ден на 19 јули се истргувани 7.055 акции по цена од 3.800 денари за акција. Од тогаш наваму цената на акцијата порасна за 700 денари со истргувани 1.350 акции. Која е логиката да расте цената на таа акција во услови кога нејзиниот основен бизнис покажува надолна тенденција? Особено кога прашање е дали менаџментот може да покаже флексибилност со оглед на структурата и годините?  Си знаат купувачите. Можно е тоа што „Македонијатурист“ има 20 милиони евра во краткорочни вложувања.

Р.Ф.