Тевдовски за Блумберг: Со завршување на политичката криза, веќе гледаме одредено зголемување на економската активност

Добивај вести на Viber

Економскиот раст во Република Македонија, следната година може да биде повисок од 3%, откако со формирање на владата на премиерот Зоран Заев пред четири месеци се заврши двегодишната политичка криза што ги забавуваше инвестициите, објави Блумберг. 

Растот на бруто домашниот производ во 2018 ќе се зголеми од проценетите 2,2% за оваа година (најнизок економски резултат последниве пет години), придвижен од приватната потрошувачка и извоз, изјави 38-годишниот министер за финансии на Република Македонија, Драган Тевдовски, во одговор на прашања на Блумберг. 

„Владата планира да го намали буџетскиот дефицит за 2018 година под 2,9% од БДП, колку што изнесуваше оваа година, и постои можност да издаде меѓународна обврзница на глобалниот пазар“- рече тој.

Тевдовски за Блумберг вели дека со завршување на политичката криза, веќе гледаат одредено зголемување на економската активност,  која ќе се интензивира следната година. 

„Одлучни сме дефицитот следната година да биде незначително помал од оваа година, во согласност со нашата намера за постепена фискална консолидација. Што се однесува до 2018 година, издавање меѓународна обврзница е исто така опција, имајќи ги предвид поволните услови на меѓународниот пазар“- вели министерот. 

Заев формираше коалициона влада во јуни, со што се случи првата промена на владата по повеќе од една декада, која ветува заживување на напорите на земјата за прием во Европската Унија и во НАТО, откако скандалот со прислушувањето во 2015 година ја симна претходната влада, наведува Блумберг.