Професорки бараат Иванов да стави вето на Законот за јазици
Објавено во: Македонија 16 Декември, 2017
Законот за албанскиот јазик е спротивен на Уставот, го надминува Рамковниот договор и ќе ја легитмира Македонија како земја со двојазичен и двонационален идентитет, сметаат професорките кои му пишаа на шефот на државата Ѓорѓе Иванов.
Академик Катица Ќулафкова, професорката по политички систем Гордана Силјановска и професорката од Институтот за македонски јазик, Симона Груевска Маџовска во отворено писмо наведуваат дека станува збор за лош закон кој ќе ја наруши кохезијата меѓу граѓаните во Македонија.
„Во прашање е лош закон од аспект на меѓуетничките односи, владеењето на правото, Охридскиот рамковен договор, деловничката процедура, европските јазични политики и номотехниката“ – стои во писмото на професорките.
Тие предупредуваат дека радикалните промени на статусот на албанскиот јазик може да ја сменат идентитетската карта на Македонија во Обединетите нации и бараат од Претседателот Ѓорѓе Иванов да стави вето.
„Поранешниот претседател Црвенковски стави вето на Законот за употреба на јазикот што го зборуваат најмалку 20 % од граѓаните во РМ и во единиците на локалната самоуправа во 2008. Редно е претседателот Ѓорѓе Иванов, барем еднаш, да посегне по вето, не за да манифестира моќ, туку заради правната држава. Ако пратениците повторно го изгласаат со апсолутно мнозинство, на потег е Уставниот суд на РМ, којшто мора да го (од)брани Уставот!“ – пишуваат професорките во своето отворено писмо.
За овој закон во Собранието имаше бурна расправа на релација ДУИ-БЕСА.