Меркел посакува заедничко решение за бегалската криза во Европа

Добивај вести на Viber

Европа треба да најде заедничко решение за бегалската криза, изјави германската канцеларка Ангела Меркел на одбележување на 60 годишнината од формирањето на европската заедница со што беше постигнат долготраен мир, но денес предизвиците на Стариот континент се многу посложени.

- Во заедницата, основана на принципот на солидарност секоја земја треба да придонесе според можностите, рече Меркел.

Според неа изминатите две години е постигнат голем напредок, но има уште многу работи да се завршат.

Таа зборуваше и за папата Франциско, при што ја оцени како мошне инспиративна неговата вчерашна изјава.

Тој вчера се сретна со лидерите на 27-те земји-членки на Унијата пред денешниот самит во Рим посветен на 60 годишнината од потпишувањето на Римскиот договор.

- Кога ги отворивме внатрешните граници, ние не мислевме за зајакнување на надворешните граници. Кога воведувавме единствена валута не бевме подготвени за кризата. Но во моментов го правиме сето тоа преку банкарската унија и стабилизациските механизми. Најважно е сето тоа да се направи во атмосфера на солидарност, рече Меркел.

- Треба да ги гарантираме условите луѓето да не бегаат од своите земји, да ги решиме кризите, како таа во Сирија и тоа да го сториме заедно, додаде Меркел.