Марин Ле Пен: Време е да се заврши со ЕУ!
Објавено во: Свет 24 Февруари, 2017
Кандидатката на крајната десница за претседател на Франција Марин Ле Пен, која води според анкетите за победа во првиот круг, изјави дека е „време да се заврши со ЕУ", пренесе Франс прес.
„Во Европа е време да се заврши со една Европска унија, со тоа искушение за спојување што ја уништува Европа на нациите"- изјави Ле Пен на конференција во Париз пред новинари и претставници на 42 држави, меѓу кои амбасадорите на Тајван, Камбоџа, Куба, Саудиска Арабија, Албанија и Јемен, како и кинески и американски дипломати, се вели во соопштението на партијата на Ле Пен - Националниот фронт.
Треба да се заврши со тоа бирократски чудовиште, додаде Ле Пен. Таа одамна ја критикува ЕУ и ја смета за „тоталитарна".
„ЕУ ја понижува Франција, ја одделува од светот. Се радувам на преродбата на европските народи против ЕУ за Европа како континент“- рече таа, имајќи ја предвид одлуката на Британците од минатата година да ја напуштат ЕУ.
Ќе изградиме друга Европа, вети Ле Пен. Таа го осуди „стратешкиот авантуризам на САД" и го поздрави „реализмот и волјата за промена" на новиот американски претседател Доналд Трамп.