Кумуцакос: Победата на СДСМ во првиот круг е можност за подобрување на односите меѓу Скопје и Атина
Објавено во: Балкан 17 Октомври, 2017
Пратеникот на грчката опозициска партија Нова демократија, Јоргос Кумуцакос, во интервју за грчката новинска агенција АНА-МПА вели дека победата на СДСМ во првиот круг од локалните избори е позитивен тек на настаните и можност за подобрување на односите меѓу Скопје и Атина.
Вели дека ќе вложат напори да се реши спорот со името.
„Самиот факт што националистот Никола Груевски загуби на локалните избори, е позитивен тек на развојот на настаните. Сега во Скопје имаме многу посигурни и попродуктивни соговорници во однос на прашањето за името“ – истакна Кумуцакос.
Кумуцакос изразува задоволство од подобрување на атмосферата со Македонија за решавање на спорот за името и истакнува дека Грција ќе стори сè што е потребно за да се реши спорот, со што ќе се отвори евроатлантската перспектива за земјава.
За посетата на грчкиот премиер Алексис Ципрас на Вашингтон, Кумуцакос вели дека очекува конкретни резултати за одредени прашања важни за Грција.
Според него, тоа е златна шанса за Грција, која, да обезбеди позитивна позиција од САД, не само за спорот со Македонија, туку и за односите со Турција, кипарското прашање и за други прашања што се од национален интерес.
Ципрас денеска ќе се сретне со американскиот претседател Доналд Трамп.