Косово слави 10-годишнина од прогласувањето независност
Објавено во: Балкан 17 Февруари, 2018
Косово слави. Денеска се навршуваат десет години од прогласувањето на независност со одлука на Собранието на 17 февруари 2008 година. По тој повод денеска владата на Косово ќе одржи свечена седница.
Граѓаните ќе можат да прослават со повеќе манифестации и собири.
Прославата започна со спортски активности за деца, а продолжува со културно-уметничка програма. Во националната библиотека предвидено е отворање на изложбата „Косово од историја до државност“, по што ќе биде прикажан филмот „Татко“.
Концерт на светски познатата пејачка со потекло од Косово Рита Ора е најавен за вечерва, а на нејзино барање, влезот ќе биде бесплатен.
Утре ќе биде одржана конференција „Една деценија независност“, а потоа Собранието ќе одржи свечена седница по која ќе има парада на безбедносните сили и полицијата.
„Б92“ објави дека по 10 години, Косово го признале околу 100 држави. Точниот број, според изјавите на Белград и Приштина останува недоумица. Приштина тврди дека Косово го признале 116 држави, од Белград, пак, ја оспоруваат оваа бројка. По едностраното прогласување независност, Косово веднаш го признале повеќе од 50 држави, а од 2009 година признанијата стигнувале сè поретко.