КИМ НА КРИЛЈАТА НА БИТКОИНОТ: Како Северна Кореја се богати на сметка на дигиталната валута?
Објавено во: Свет 16 Декември, 2017
Брокерите не се единствени кои ја слават биткоин треската која овие денови ја тресе планетата-од неа би можел да профитира и севернокорејскиот лидер Ким Јонг-ун.
Експертите тврдат дека Северна Кореја во последните месеци „копа“ биткоини , бара како откуп или едноставно ги краде.
„Факт е дека Северна Кореја напаѓа виртуелни берзи“, изјави директорот на јужнокорејската Агенција за интернет и безбедност Донг Јун Ли.
„Не знаеме колку Северна Кореја досега украла, но полицијата потврдила дека режимот спроведува обид на хакирање“, додал Ли.
Севернокорејските хакери летово нападнале јужнокорејски берзи кои тргуваат со биткоин и други дигитални валути. Според полицискиот извештај на вработените им праќале злонамерни е-пораки.
До биткоин се доаѓа со „копање“ на комплексни алгоритми, а потоа се чуваат во дигитална сметководствена книга.
Експертите не знаат со која количина на биткоини моментално Северна Кореја располага. Се проценува дека нападите ќе продолжат поради изразена вредност која криптовалутата ја достигнала. Вредноста од почетокот на годината пораснала за 1500 отсто и минатата недела достигнала 17 000 долари.
Привлечноста на биткоинот за Северна Кореја не лежи само во неговата вредност туку и во фактот дека со таа дигитална валута не управува одредена влада или банка. За таа земја тоа е посебно важно кога САД се заканува со искучување на Северна Кореја од меѓународниот финансиски систем поради нејзината програма на нуклеарно вооружување.
Биткоинот е популарен меѓу криминалците бидејќи обезбедвува целосна анонимност на исплата, без користење на банките како посредници. Северна Кореја поради тоа своите залихи би можела лесно да ги замени за пари, кои потоа може слободно да ги користи.
Брајс Боланд од компанијата за криптосигурност ФајерАј нагласува дека хакерите на биткоини често ги менуваат за други, пооскудни дигитални валути, а потоа ги селат на други берзи и на крај ги повлекуваат во традиционални валути.
„Со тоа е невозможно да се влезе во траг“, нагласува Боланд.
Познатиот Универзитет за наука и технологија во Пјонгјанг минатиот месец угостил странски експерт за биткоин. Според изјавата на Универзитетот, на предавањта се разработени бројни „технички прашања“ за функционирање на дигиталната валута.
Боланд верува дека Северна Кореја развива војска експерти за биткоин за да го унапреди бизнисот во тој сегмент. Се очекува раст на напади на берзи на биткоин и останати криптовалути.