Дачиќ бара разграничување, за Хоџај таквите изјави се опасни
Објавено во: Балкан 14 Август, 2017
Српскиот министер за надворешни работи, Ивица Дачиќ во авториски текст во весникот „Вечерње новости“ пишува дека во интерес на сите е да се постигне трајно решение за српско-албанскиот спор.
Според него, до тоа може да се дојде само преку договор меѓу Србите и Албанците во кој и двете страни ќе добијат и ќе загубат по нешто.
„Тоа е идеја за компромис врз историски и етнички права. Идеја за разграничување на она што е српско, а што албанско и за нормализација на нашите односи“ - наведува Дачиќ.
Според него, со тој договор, српските православни манастири во Косово би требале да добијат статус на „самостојни манастрирски заедници по примерот на атолскиот модел во Грција“.
Натаму тој предлага и формирање на заедница на српските општини во јужниот дел на Косово, како и финансиски надомест за „узурпираниот приватен и државен имот“.
Поранешниот шеф на косовската дипломатија и пратеник, Енвер Хоџај денеска изјави дека границите на Косово се меѓународно признаени и дека идеите на Србија за промена на границите се „опасни и неприфатливи“.
„Косово е мултиетничко општество со меѓународно признати граници“- напиша Хоџај на Твитер.
Тој додаде дека „идеите кои ги повторува Србија за промени на границите се опасни и неприфатливи“.
Хоџај смета дека внатрешниот дијалог на Србија за решавање на косовското прашање ќе пропадне ако не заврши со признавање на независноста и државноста на Косово.