„Банана“ за Амди Бајрам од ДУИ

Добивај вести на Viber

Амди Бајрам најверојатно нема да добие шанса да се приклучи на пратеничката група на ДУИ без оглед што неговиот глас во Собранието би бил од големо значење за владината коалиција со шанси да го зголемат своето парламентарно мнозинство.

Политичарот кој користеше фудбалски жаргони да ги опише своите маестрални потези против Бранко Црвенковски и други противници, сега кошаркарски кажано доби „банана“ од ДУИ, односно блокада за обидот да си најде своја група во Собранието со која ќе дејствува во координација.

Од ДУИ посочуваат дека Амди Бајрам може да делува како независен пратеник без да е дел од никоја пратеничка група и како ќе настапува во Собранието, односно како ќе гласа ќе биде негова апсолутна слобода.

Неодамна Амди Бајрам иако е дел од коалицијата предводена од ВМРО-ДПМНЕ одлучи да присуствува во работата на Собранието иако опозицијата се договори да бојкотира што беше знак дека веќе не ги слуша насоките на Груевски.

Да потсетиме дека Амди Бајрам во минатото има изјавувано дека неговата партија која ги застапува Ромите ќе биде во коалиција со тој што е на власт за да може да оствари поголеми права иако јавноста долго време е свесна дека главна причина за неговата „љубов“ кон Груевски беа вработувањата на неговите кадри во државната администрација.

Со оглед на тоа што СДСМ има проблеми со Алијансата за Албанците и потенцијално растурање на коалицијата поддршка ќе им биде потребна од нови пратеници во Собранието, односно рекомпонирање на силите за што веќе се шпекулира дека во игра за нови договори се пратениците на ГРОМ Саздовски и Минов, како и пратениците на ДПА. СДСМ заедно со ДУИ имаат 59 пратеници, нив би ги поддржал евентуално и Весел Мемеди кој ќе ја напушти коалицијата во Собранието со Алијансата, бидејќи неговата партија и онака не настапи со Зијадин Села на локалните избори туку со СДСМ и ДУИ.