10 години од починувањето на првиот премиер на независна Македонија

Добивај вести на Viber

Никола Кљусев, првиот премиер во независна Република Македонија, почина на денешен ден пред точно 10 години. Тој ја водеше првата македонска влада составена од експерти пред да се одржат следните парламентарни избори на кои победи СДСМ и го избра Црвенковски за претседател на владата. 

Освен премиер, тој беше и економист, универзитетски професор, истражувач. општетсвеник и член на МАНУ.

Кљусев е роден на 2 октомври 1927-та година во Штип, а во периодот од 1942 до 1945-та година учествувал и во Антифашистичката борба во Скопје. Во 1947 година заминал на студии на Економски факултет во Белград, каде бил уапсен и испратен на Голи Оток, поради што две години бил исклучен од Универзитетот. Дипломирал економија во Белград во 1953 година, а докторирал во 1964 година.

Кљусев беше првиот премиер на првата експертска Влада на Република Македонија во периодот од 1991-1992 година, период во кој беше воведена македонската валута денарот и формирана Армијата на Репблика Македонија.

По премиерската функција, Кљусев во периодот од 1 декември 1998 до 28 јули 2000 година беше министер за одбрана во Владата на Љубчо Георгиевски, а во 2006 година беше именуван од Владата на Република Македонија за претседател на Управниот одбор на Агенцијата за директни странски инвестиции.

Почина на 16-ти јануари, во 2008-та година, на 80 годишна возраст.